Ich Geh' Mit Meiner Laterne: a canción da miña infancia

Esta era canción máis esperada da miña infancia no Colexio Alemán de Vigo. Tratábase dunha celebración pola que agardabamos con devoción, xa que ese día os nenos e nenas percorriamos todo o edificio do colexio en fila india, coas luces apagadas e os Laterne prendidos. O edificio estaba situado entre Torrecedeira e Pi i Margal, que daquela se chamaba General Aranda e, anos despois, foi desmontado pedra a pedra, sen que hoxe se saiba moi ben que foi del. Non sei que tiña aquel centro de ensino, unha especie de illa educativa nos últimos anos do franquismo, pero deixounos unha lembranza especial.  Nada que ver co seguinte colexio que pisei para rematar 7º e 8º de EXB, cando se iniciaba a Transición. Eu debín entrar no Colexio Alemán en 1968 ou 1969, en Kindergarten. Alí compartín aula con Helena de Carlos, que tampouco esqueceu ese Vigo. As cousas que penetran a pupila durante a infancia márcannos para sempre.