Los Chichos

Aos 19 anos vivín unha tempada en Madrid. Naquela época, decidira romper cun sistema de ensino mediocre e abafante e abandonei os estudos e a miña casa familiar (sen conflicto, por certo, porque os meus pais sempre intentaron respectar as miñas decisións). Primeiro traballei uns meses en condicións moi duras en Santiago de Compostela e logo marchei a Madrid. A partir das miñas vivencias no barrio de Aluche, naquela época escribín un pequeno texto sobre Os Chichos que logo reescribín un par de veces. Os Chichos era a música que se escoitaba naquel barrio cando comezaban os oitenta. Eu, publicamente, aínda non era escritor, pero levaba aniñando canda min esa vocación desde a infancia. E escribía, por suposto. Dez anos despois, reencontreime cos Chichos cando viaxei cos camioneiros para escribir Tráiler. Esta é a banda sonora da novela. O machismo exacerbado das súas letras reflicte a atmosfera da obra. Socioloxicamente son tan significativas que alguén debería estudar a súa influencia.

Recital en Madrid

O xoves 27 de setembro estarei en Madrid, participando nun recital poético na Casa de Galicia, xunto con Marilar Aleixandre e Román Raña. O acto estará presentado e moderado por Vicente Araguas e pertence ao ciclo Estacións Poéticas. Será ás oito da tarde, na rúa Casado del Alisal, 8, moi perto do Museo do Prado.